Cum hereditarium regnum Nostrum Siciliae, cuius Nobis praeclara hereditas, laudabiles mores suorum incolarum consueverit enutrire, ac processu temporis habitatores ipsius servitii et fidei exhibitione claruerint in necessitatibus dominorum, saepe iam contigisse dolemus, quod per mixturam diversarum gentium passa est ex alienis moribus regni sinceritas corruptelam. Ita quod ex quo regni filiae se cum alienigenarum filiis miscuerunt, denigrata est puritas hominum, et increscente dierum malitia et infirmitate mentium inquinata conversatione ac usibus ceterorum varietas crevit in populis, et ab illo fermento grex est fidelium maculatus. Ne timeatur ergo deinceps cohabitantium in regno diversitas nationum magna allatura discrimina vel ad magnum regni incommodum progressura, volentes huiusmodi diversitatibus competens adhibere remedium, praesertim ut in regno Nostro gentium uniformitas nutriatur, generali edicto duximus solemniter statuendum universis de regno et singulis inhibentes, quod nulli amodo liceat de filiis et filiabus regni matrimonium cum exteris et adventitiis, qui vel quae non sunt de regno, absque requisitione, mandato et consensu curiae Nostrae contrahere, videlicet ut nec aliquae de regno nubere alienigenis audeant nec aliqui filias alienigenarum ducere in uxorem. Hos, qui contra dictum ire praesumpserint, bonorum omnium spoliatione mulctamus.