[Mores dissolute viventium imposite pene formidine ad frugem melioris vite reducere cupientes statuimus eos, qui ad datios sic ex quadam consuetudine ludunt et in] ludo ipso continue conversantur, ut nulli alii vacent officio, de quo vivant, tabernarios etiam, qui tabernas velut naturales lares et proprios elegerunt. ¶ Eos etiam, qui aleas et datios tenent, ut ea predictis ludentibus commodent, inter infames haberi, ita ut nec ad testimonium nec ad officium aliquod publicum admittantur. Iudices etiam, advocatos et notarios publicos, qui huiusmodi vilem et sordidam vitam ducunt, infamia predicta notatos a susceptis etiam iam officiis in perpetuum volumus amoveri. ¶ Postremo etiam milites, quos saltim equestris dignitatis decus deberet a talibus cohercere, si fame sue prodigi et pudoris ignari ad vilitatem huiusmodi deduxerint vitam suam, in perpetuum a testimonio submovemus, ab eis etiam iudicia , que viris militaribus sunt concessa, in perpetuum abdicantes.